عايشاك

                                            لو ع الطريق أدلك لقلبى تقربه
                                           بس المـــهم إنك ترعـاه وتحببه
                                                      فى الحب يدوق حنانك
                                                      وف قلبى يكون مكانك
                                                      يسمع همسة كلامك 
                                                      من صوتك تطربه
                                            لو ع الطريق أدلك لقلبى تقربه
                                                       0000000  
                                                       أنا مش بعيد ولاأنت   
                                                       مش عارف مين أنا
                                                      طب يعنى يبقى إمتى
                                                      ح أنقابل بعضنــــــا
                                         نحكى لبعض الحاجات
                                        اللى عايشه ف سكــات
                                       تطلع من غير ما ندرى وقلوبنا تعربه
                                       لو ع الطريق أدلك لقلبــــــــــى تقربه
                                                    00000000 
                                                   عايشاك وإنت قصادى   
                                                             ياحبيبى بتبتدى
                                                      ترمينى بنظرة حلوة   
                                                        بعنيك من دى لدى
                                                  وأعمل مش واخده بالى
                                                  قال يعنى وقـــلبى خالى
                                   وأتمنى بشوق أقول لك إن إنت مدوبه
                                   لو ع الطريق أدلك لقلبــــــــــى تقربه
                                                      00000000

هو ده بيت القصيد

                            أغلى شيىء فى الدنيا نصرة
                                            أحلى يوم فى العمـــــــــرعيد
                                                      يوم ما تتحقق بفرحه
                                                      نصرتك وتكون أكيد
                                            هو ده بيت القصيد
                                            المــهم تكون سعيد
                                                        ××××××
                                           الحياه تاخد وتدى
                                          ترس داير جوه آله
                                          أى يوم فيها يعدى
                                         سهل دايما إستحاله
                                                 بس إوعى فى يوم تسلم
                                                 خلى عزمــك من حديد
                                          هو ده بيت القصيد
                                          المـــهم تكون سعيد
                                                      ×××××××
                                          الأمل موجود قصــــادك
                                          طول ما عمرك فيه حياة
                                          بس إســعى تنول مرادك
                                         واللى ربه يكون معـــــاه
                                                 ينكتب له من جديـــــــــد
                                                رزق تانى ما لوش حدود
                                         هو ده بيت القصيد
                                         المــهم تكون سعيد
                                                    ××××××××

انا فى رحابك

                                   أنا فى رحابك صليت   وطفت الكعبة وحطيت
                                                 إيدى على بابها ودعيت
                                                 تغفر لى ذنوبى وبكيت
                                             ياريتنى عمرى أنا ما عصيت
                          عايز أطلع عمرة فى رمضان       وأتبارك برضى الرحمن
                                                 وأصلى وأدعى وأقول
                                               أستنى فى مكه على طول
                                               وأشرب من زمزم وأنول
                                               بدعايا لعفوك فى البيــت
                                             ياريتنى عمرى أنا ماعصيت
                                       وأطوف ويا الزوار ونردد أحلى الأذكار
                                       نتمنى لينا الغفران  والتوبه وهدى الديان
                                      هللت بإسمك وسعيت فى الصفا والمروة
                                      ولبيت ..   ياريتنى عمرى أنا ما عصيت
                                                   000000000

شكوى إلى العم

                           خيبه قوية تقيله ياعم
                          يالا بجملت باقى الهم
                          يوم ورا يوم
                         العيشة بتمسخ
                         بقت الدنيا كئيبه وسم
                         مهما نعدل ما بتتعدل
                         ولا نلملم ما بتتلم
                         مش عارفين آخرتها
                         معانا دا إحنا وقعنا
                         ومين يهتم
                         واللى ناقصنا
                         دعاء الأم
                         جانا ما جانا
                         ياريته ما جانا
                        البطريق إللى ما خلانا
                        طايلين سمكه ولا بدنجانه
                       ولا رغيف عيش حاف لغدانا
                       يصلب عودنا ويقوتنا
                       ويعوضنا فى ذل شقانا
                       ما بقاش فينا جهاد ولا عزم
                       ليه ياحبايب ما لناش صاحب
                       حضرة نايب ولا كبير
                       يعلى بصوته يجافى سكوته
                       ولا يطالب بالتغيير
                       دا إحنا غلابه ودم ولحم
                      وبنشكيلك حالنا ياعــــــم

رباعيات

                              قول ياجاهل كلمتك
                              بيع يافاسد ذمتــــك
                       ما إنت جيت فى وقت نومته
                             القانون مش حضرتك
                                     """""""
                            تفتــــرى ليه يابن آدم   
                            بكره ترجع للتـــراب
                            جوه عالـــــــم إبتديته
                            آخرته فانيه وســراب
                                    """"""""
                            هم هم هم يــاهم يـاهم
                         مين فى حياتنا ما دقش الغم
                          ناكل نشرب نضحك نبكى
                             لازم تقلب نطرش دم
                                   """""""""
                               يازمن باميه وكوسة
                             ياشباب لايص وهيصه
                               الرجال ما بيعرفوش
                            والبنات صابها العنوسة
                                  """"""""""

يهديك يابن الحلال

          ماتفوت علينا بكره    يهديك يابن الحلال
         وأرمينا ولو بنظرة    بتسوق ليه فى الدلال
                      ده هواك وافق هوانا
                      حبك علم معانا
                     والدنيا مقضيانا
                     أنا وإنت آخر جمال
                     يهديك يابن الحلال
            إتعلمنا المحبه على إيديك ياوله
            وبقينا من الأحبه ووقعنا فى مشكله
                    حبك أثَر علينا
                    بيجافى النوم عينينا
                    عايزين حد يداوينا
                    م الفكر وم الخيال
                    يهديك يابن الحلال
           ما تغيبش كتير علينا وتسيبنا لوحدنا
           دى الوحده مخليانا بنكلم نفسنــــــــا
                   حود وإسهر معانا
                   وإظهر ياقمر سمانا
                   خلينا نعيش هوانا
                   ونداوم ع الوصال
                   يهديك يابن الحلال

ياعم الله يسهل لك

                                            ياعم الله يسهل لك ويحنن برضــــه عليك
                                            الدنيا أهى زهزهت لك والحظ كمان مديك
                                            مشيت وياك حلاوة     وبقيت آخر غناوة
                                           ونسيت ناسك وأهلك    وبعت إللى شاريك
                                              ياعمالله يسهل لك ويحنن برضه عليك
فت الصحبه الجميله ليه بعد ما كنا عيله
بتجمعنا الموده والحب سنين طويلـــــــه
ولا تبعت مره جواب تسأل فيه ع الأحباب
مش لازم حد يقول لك ولا حتى تعدى عليك

    ياعم الله يسهل لك ويحنن برضه عليك

                                                       بتبيعنى ليه ياصاحبى هو أنا دلوقت مالى
                                                       تطعنَى ليه فى قلبى ما كفايه اللى جرالى
                                                       أزاى لما تقابلنى تجرى وتتدارى منى
                                                       وأنا من طيبتى بسامحك
                                                       ما أرضاش أعتب عليك
                                                       ياعم الله يسهل لك ويحنن برضه عليك
مسيرها بكره تحلى ويانا إحنا كمان
وح نفضل زى ما إحنا وأصحابنا بتوع زمان
فى الشده نشيل معاهم
فى الفرح نكون غناهم
ما نخنش العشرة زيك
والناس تعايرنا بيك
ياعم الله يسهل لك ويحنن برضه عليك

ابن الحتة

                                     الواد مشاغلنى إبن الحته    الواد أبو بدله وكرافته
                                                من نظرة عين     ماأعرفش أنا فين
                                                       وأتلخبط وأتوه فى السكه
                                                       الواد مشاغلنى إبن الحته
                                       فى الراحه والجايه بيندهلى    ليه مش عارفه
                                       مش خايف لو يعرفوا أهلى    والله أنا خايفـه
                                               وأتبسم وأعمل مش عارفـــــــــاه
                                               وأنا  دايبه ياناس دوبان فى هواه
                                             من نظرة عين      ماأعرفش أنا فين
                                                     وأتلخبط وأتوه فى السكه
                                                     الواد مشاغلنى ابن الحته
                                  إرحمنى ياواد وإبعد عنى ليشوفك أخويــــــا يزعــلنى
                                  وإن كنت صحيح عينك منى روح قابل أبوياوإخطبنى
                                              وســــاعتها حتتقرى فتحتنـــــا
                                              ونقـــابل بعض فى حتتنــــــــا
                                           من نظرة عين        ماأعرفش أنا فين
                                                    وأتلخبط وأتوه فى السكه
                                                    الواد مشاغلنى إبن الحته
                                                            """"""""

أتقدم لى

إتقدملى وقلت لروحى إيه رأيك فيه؟ روحى قالتلى قوليلى الأول بتحبيه؟قلت باحبه وأدوب من حبه لما صارحنى وبان فى عينيه إتقدملى أجمل حاجه صادفها خيالى إنى قابلت حبيبى الغالى هو بصورته فى حلم حلمته وجالى حقيقه فى لحظه قبالى من غير ما يكون بينا ميعاد حبنا سطر لينا ميلاد وأمر قلبى أحبه تمللى إتقدملى قلبى حقيقى بيطمن له ولقيت روحى بافكر فيه وبقيت خايفه عليه من ضلَه قبل ماغيرى يحاجى عليه حبه الدافى طرح بستان جنه زرعها حنان وأمانه هو حبيبى الغالى وخلَى إتقدملى """"""""

نفسى أسامحك

نفسى أسامحك وأنسى جرحك نفسى أصدق حتى كدبك لكن أعمل إيه فى قلبى إللى خد على خاطره منك قلت له ياقلبى سامحه قاللى لأ مستحيل أرجع وأصالحه ألف لأ وبصراحه ياحبيبى عنده حق. كنت فاكراك مش بتخدع لما قلبى إداك أمان حبى ليك فى حياتى أروع شيىء لقيته معاك زمان جاى تانى تعيده ليه والندم ينفع بإيه تفتكر ح أقبل وأقولك من عينيه وتحت أمرك قلتله ياقلبى سامحه قاللى لأ...... إبعد بجرحك الله يسامحك تعبت قلبى فى الحب جنبك أوعى تحلم إن قلبى يرضى تانى يلين لحبك حب غيرى ما فيش فى قلبه مرار وجرح ما تحاولش ما فيش فى قلبى مكان لفرح قلت له ياقلبى سامحه قاللى لأ.......بس خلاص

حيروك ياحب

حيروك ياحب فيهم الحبايب كلهم مش كفايه إنك عشانهم جاى تجمع شملهم اللى يشكى واللى يبكى واللى قاسوا فى حبهم وأما تبعد عن طريقهم يشتكوك ليعضهم خيروك ياحب فيهم الحبايب كلهم ======= ياحبايب إيه جرالكم حبكم ليه تظلموه هو كان الحب باعكم لما دلوقت تبيعوه إنتوا أسباب الجراح من قساوة قلبكم حد فيكم قال سماح أوعاتبتوا بعضكم ده الحنان فى الحب كله إوعى تزعل منهم حيروك ياحب فيهم الحبايب كلهم الغرام بين الأحبه له عبير زى الزهور جوه كاس أشواق ودايب يرتوا لمايدور يشربوه يبقوا فى نشوى والعليل منهم بيشفى حبهم صافى فى قلوبهم عشقهم داعب جفونهم والدموع تجرى فى عيونهم من حلاوة حبهم حيروك ياحب فيهم الحبايب كلهم

Windows Live Hotmail

Windows Live Hotmail

Windows Live Hotmail

Windows Live Hotmail

مسودة Blogger:لوحة التحكم الرئيسية

مسودة Blogger:لوحة التحكم الرئيسية

Windows Live Hotmail

Windows Live Hotmail

ياريت بإيدنا

                           شهر الصيام جانا وشرف           وهل نوره فى كل مكـــــان
                           ياريت بإيدنــــا لو نعرف            نخللى طول السنه رمضان
                                                         )))))))))                                
                          الخير بييجى على قدومك            نعم كتير أشكــــــال وألوان
                         كريم وجيد من يـــــــومك            بتعلم النـــــاس الإحســـــان
                         بيطيب لنا لما نصـــومك             تطول صلاتنـــــــا بالقرآن
                         ياريت بإيدنــــا لو نعرف            نخللى طول السنه رمضان
                                                       >>>>>>                                
                       فى كل مرة تعود لينـــــــا             نقيـــــــــــــم مآدب للرحمن
                       ونروح ندوَر حوالينــــــا             على الفقير وعلى الغلبــــان
                      وولادنا تفرح بالزينــــــه              ويعلقوها على البيبـــــــــان
                      ياريت بإيدنـــا لو نعرف              نخللى طول السنه رمضان
                                                     ((((((((((

عالم عجيب

عالم عجيب بصحيح
الناس بقت تماسيح
عماله تاكل بعضها
والكل بات مجاريح
              جتت كتير مطاريح
والحدادى جت تنادى
والصقور عادت تدور
مبقاش يطير عصفور
             شارد فى وسط الريح
            عن سكه فيهـــا يروح
والدنيا توهـــــــــــة
      وإنطفت الزينه والمصابيح
فيه ناس قلوبها بتنفطر
وناس قلوبهم من حجر
               لا حد فيهم بيسامح
               ولاحد منهم له ملامح
زى البشر  والأقوى هو المنتصر
ماتت دموعهم فى العيون
بقت الحياه شك وظنون
ونذير خطر
مبقاش فيه حد صريح
ولا حد عايز يعتبر
لابد من تصحيـــــــح

آه يابن الإيه

                                     آه يابن الإيه يامحيرنى        ياحارمنى النوم ومسهرنى
                                                    بعدين وياك خدت على هواك
                                                    وأنا تحت الأمر وملك إيديـــه
                                                                آه يابن الأيه
                                    حبيتك من أول كلمـــــــــه      قلتها من قلبك حسيت بيه
                                    مش قادره أتحمل والنعمه      ولا قلبى كمان باتحكم فيه
                                                   بعدين وياك خدت على هواك
                                                   وغيــــــابك عنى بيكتر ليــــه
                                                               آه يابن الإيه
                                   الشوق بيقوللى إزاى أمـــال    لما أنت حبيبته بيتقل ليـــه
                                  إبعت له ياشوق منك مرسال   يمكن ييجى يطمنى عليـــه
                                                  بعدين وياك خدت على هواك
                                                 هو أنت ما ليكش حبيب تراعيه  
                                                              آه يابن الأيه
                                  الله على حبـــك وطعـــامته    وهواك من يوم ما إتنسمته
                                  وكلام بعيونك يامــا قلتـــه     ولا عمرى قريته ولا سمعته
                                                  بعدين وياك خدت على هواك
                                                  مش لاقيه القلب إللى يقضيــه
                                                             آه يابن الإيه 

إلى كل الأصدقاء

أسعدنى كثيرا أن أراكم من خلال كلماتكم الرائعة ومن خلال صفوة من البشر وباقة مزدهرة من العقول المستنيرة.أشكركم جميعا لأنكم منحتمونى الأمل والشجاعة على أن أستمر فى طريقى للكتابة وأنه لم يدر بخلدى يوما أن أكون كاتبا أو مبدعا إلا أننى فقط أعبر عن بعض أحاسيسى وأضيع ما تبقى من العمرما بين مدوناتى وأحفادى وأسباطى وأجمع حولى حصاد العمر من الأبناءوأخدم شريكة العمر وأرد لها الجميل كما سبقتنى إليه من قبل.
أنا سعيد جدا بهذه الصداقات بقدر إتساع هذا العا لم الذى نعيش فيه ، يسعدنى أيضا أن أتلقى كل ما إستطعتم من النقد البناء الهادف .وفقنى الله وإياكم فعل الصواب
أما عن إبنى وصديقى صاحب رسالة ما زال للحديث بقية. أولا أنا فى غاية الأسف لتأخرى فى الرد عليك.أنت يابنى مجنون والجنون فنون فأنت تتمتع بقدر عال من الخيال والرؤية الواقعية الشامله
والأحاسيس المرهفة مما يؤهلك لأن تكون كاتبا أو قصاصا او روائيا هذا إلى جانب تذوققك
للشعر الراقى،وروحك المرحة العذبة وطفولتك البريئه وبرك لأهلك وهذا جميىىىىىىل
لماذا نخسر ما كتبنا، ولماذا تتوقف أناملنا، وإن كان هناك شيئا نخفيه، فلندع الأقدار تخبرنا
قصرت الحياة ام بعدت، فالكلم الطيب يوصلنا، لم يأت الموت وما كنا نخشاه إن كان يلاحقنا، عذرا
إن دمعت أعيننا، فالحس المرهف يقتلنا،يكفيك دموعا ياولدى، تكفيك الآهة والهنة.
وإلى من قال لى أنه سوف يتابع كتا باتى هذا شرف عظيم لى وأرجو ألا ينقطع,
أما ما يخص السيد الفاضل والأخ الكريم وسيادة الشا عر العظيم الذى منحنى شرف النظر
والرعاية والموافقة على ما أكتب فأنا إذن من المحظوظين أسعدكم الله كما أسعدتمونى
وما زال حديثنا له بقية إن شاء الله,.

أنت التواب

كريم وقاصد باب بيتك
ياريت توارب ليَا الباب
أنا برضه عبدك وناديتك نويت أتوب وانت التواب
ــــــــــــــــــــــــــــ
عصيت وأسرفت فى ذنبى
لقيت غشاوة ملت قلبى
سامحنى واغفرلى ياربى
أنول رضاك وأنا ليك أواب
ـــــــــــــــــــــــــــــــــــ
ماليش سكن إلا فى ملكك
والكون عبيدك وأنا عبدك
وأروح لمين أنا من بعدك
يقدر يسبب لى الأسباب
ــــــــــــــــــــــــــــ
إمنحنى بركة غفرانك
واهدينى برك وأمانك
وادينى صدقة إحسانك
وأجعللى رزق فى كل مناب

صورة بلادى

بصم القمرعلى خد نيلك يابلادى
بوسه وسهر للفجر على شط الوادى
سمع الآدان قام إتوضا
من مية النيل الفضه
صلى ونام قبل الأنام
قام اليمام قال للحمام
سبح معايا وقوم نادى
كل البشر ساعة السحر
مممممممم
وطلع نهار غطى العمار
والشمس مدت شعرها
على كل دار وعلى الأثار
فوق الشواطىء والبحار
حتى الولاد لون السمار
خمرى ونازل ع الهدب
زى الدهب لون رملها
لما إنصهر
ممممممممم
الله على الصورة الحلوة
الله على بلادى السمرا
أبوس ترابك وألمه
أعمللى بيه عجنة حنة
عطشان يانيلى لمواويلى
دى قلتك بتغنيلى
ساعة ما أقيمهاعلى شفافى
تحت السجر

صابر

صابر يا أمى على البلا
وعلى اللى راح واللى بلى
من المبادىء والقيم
ومن الضمير إللى إتعدم
وراح نتان فى المزبلة
صابر وبأذرف دمعتى
ع اللى إحنا فيه وف دنيتى
وفينها راحت ضحكتى
إللى ف حياتى الأوله
لقيتها فى الوادى الكئيب
عايشه وتايهة فى  الدروب   
خلف البيبان متكبله                                                        
 لا حول لى لا لا ولا
غريق فى دمى المستباح
بقيت جسد مليان جراح.
سامحينى ياأمه ما تغضبيش
كان لازم أتنازل وأعيش
وأشوف لى حد يعوز كله
أحسن ما أبيع ياأمه الضنا
ما تزعليش ياأمه ده أنا
بقيت غريب مش من هنا.
تعبت من كتر الكلام
آخد بحقى إزاى وأنام
ومين يداويلى الآلام
ومين يحل المشكلة

قرع الطبول

قرع الطبول عالى ورهيب

مازادش غير فى الكون صدى

والفن بعد ماكان طبيــــــــب

أصبح كئيب للأفئدة.

حتى النغم جاب السقم

وكليب جنسى مافيش حشم

واحده بترعش وسطها

والتانية كاشفه نهدها

والثا لثة عريان كلها

مزز بحق موردة

ياميت خساره يازمن

ع المبدعين وأهل الفنن.

عبد الوهاب مات واندفن

وحليم وراه لما إتحقن

قنديل وكارم وسعاد

وحورية ورا ليلى مراد

والست فات بيها الميعاد

والسيد الدرويش ماعاد

قيموا الحداد ياأهل الفنون

على اللى راحوا فى المنون

وسابولنا شىء فى المنتدى
وإحنا يعوض صبرنا
ع اللى جابولنا لحدنا
الهم والفن المريب وكلنا عايزين طبيب

يشفى المرض والأكسدة

إنت شقيه

إنت شقية وقادرة عليَا
وانا مش قد عيونك ديه
دارى عيونك دارى جمالهم
باضعف جدا قوى قدامــهم
لو تعرفى عاملين إيه فيا...........دانت شقية
دارى السحر ودارى البحر
دارى الننى وأحلى رموش
ياللى نجومك جوه سمـــاكى
الزرقا الصافية ما يتعدوش
حاوصف إيه داكفاية عليــــا
إن إنت فى قلبى وجوه عينية .........دانت شقية
أحلى كلام بتقوله عيونـــــك
ولا ميت شاعر قالوا ع الحب
ضحكه وبسمه رسمها جبينك
صحبة ورد ومرســـال حــب
كل الدنيا بقت حواليه صورتك إنت ما فيش غير هياَ
دانت شقية

سيرى بأمر الله

سيرى بأمر الله ويا الأمل سيرى
وشيلى حمل الجمال ومتخافيش سيرى
شوفى طريقك فين
رايحة وجايه منين
قولى يارب آمين وفقنى فى مصيرى
..........
عمر الكفاح عمرك على السنين مكتوب
وبتكتمى ألمك حتى عن المحبـــــــــوب
وهو ده قدرك معروف كده عنــــــــــك
بتلمى فى حضنك بحنان أنا وغيــــــرى
سيرى بأمر الله ويا الأمل سيــــــــــرى ×××××
بتفردى كفوفك وبتدعى من خوفـــــــــك
بالستر لولادك من شر حســـــــــــــادك
وبتاخدى من زادك وتكرمى ضيوفـــــك
حتى إن فضى جوفك م الفرحة بتطيرى
سيرى بأمر الله ويــا الأمل سيــــــــرى
؟؟؟؟؟؟؟؟

بكره جاى

الظلم ليه؟والقتل ليه؟والحرب ليه؟
وليه فلوس بتضيع بكاااااااااام مليار جنيه؟
حق اليتامى والجياع
نرميه فى لحظة ع ألمشاع ياخدوه ولاد الإيه
كل بيت أحزان وميتم
كل شارع بيت تهدم عأللى فيــه
شوفوا الثكالى والأرامل
واللى سايب زوجه حامل
كلهم من غير رجــــــــال
واللقا أصبح محــــــــال
والأمل حبله إنقطع والدمع سايل
والوليد فى الحبل واصـــــــــــل
لسه مش دارى إللى حاصــــــل
فين أبوه سيد الرجال
وحيعمل إيه وسط العيال
لما يسمعهم يقولوا بابا جه
السلاح بقه شىء خطير
والبشر من غير ضمير
بقى له أسير
جوه حرب وطال مداها
واللى جات له منها عاهة
والضحايا بقم كتيــــــــر
كل لحظة يموت شهيـــد
والبطل هو الولـــــــــيد
إللى سابه أبوه وواجــه
من زمان نفس المصير
كلهم ماتوا وولادهم
الشهاده تمللى زادهم
والحجارة بارود سلاحهم
الله حى......بكره جـــــاى
بكرة ح تعود الإبتسامة
بكرة تترد الكرامة
بكرة نتجمع نصلى
فى الحرم مهد الديانة
كلنا ح نروح نقدس
بكرة فى كنيسة القيامة

أم الهول

إصحىيالولَه ياشاربه الكلة
صحن الفول قدام القـــــــلة
هاتى بصلتك وإفرشى صالتك
مدى إيديكى وقولى بسم الله
ليه خرصوكى وخلوا أخوكى
يتوه فى الزحمة ولف ما خلا
قــال بيدور علــى مفاتيحـــه
ما أهى قدامه ناسيها فى ريحه
إرجع ياابنى لبيتك تــــــــانى
وإبدأ عيدمن تانى الرحلـــــه
لم ولادك واحضن عيلتــك
عيد أمجادك راجع نفســــك
وإزرع أرضك لملم عرضك
قوم وإتوكل بس على اللــــه

ح أستناك

ح أستناك على بال ما تجينى

روح بسلامه وقلبى معاك

إنت صحيح بعدك على عينى

وإن كان ليا نصيب ألقــــاك

ح أستناك

آدى أشواقى معاك ياحبيبى

خدها تدوب أشواق ويــاك

مش عايزاها تزيد تعذيبــى

لما أشتاق لك وإنت هنـــاك

وأبقى إبعت لى بشوق مرسال

أما تروح ويروق الحــــــــال

أنا ما أقدرش أعيش من غيرك

واللى مصبر قلبى هــــواك

ح أستناك

لو كنت أقدر أقسم قلبــــى

نص معايا ونص معــــاك

لوإحساسى بشوقى وحبى

ينفع تاخده ويبقى غطــاك

لو فيه نجمة تروح من عندى

وتنقل روحى عشان ترعاك

كنت أتطمن على أحــوالك

وأفضل نجمة تعيش فى سماك

ح أستناك

إلى البتاع

ياعم يابناع البتاع باستحلفك بربنا
تبعت لنا حبة بتاع
م اللى إنت خادته قبلنا
نفسى أكون زيك بتاع
بس انت برضه عمنا
وبنستمد من البتاع
حاجات كتير بتهمنا
وابعدنا بس عن البتاع
يكفى بتاعك عندنا
ألا البتاع يطلع بتاع
وأهو إنت برضه مننا
ناخد راحتنا مع البتاع
اللى كمان على قدنا
يسمع لنا ونبعت بتاع
يقراه ويفهم قصدنــا
لحد ما يبقى البتاع
بتاع بتاعنا كلنــــــا

زرت بلاد الدنيا

زرت بلاد الدنيا بحالها
بعدت بيا كتير مسافات
نفسى يقرب يوم وأنولها
حج البيت وأطلع عرفات
وامسح إيدى بحجر الكعبة
الأسعد وأنول البركات
واسعى ما بين الصفا والمروة
فى ليلة جمعة سبع حجات
ويا رسول الله الأكرم
اللى إتفتحت له السماوات
صلى الله عليه وسلم
آخر من ختم الرسالات

عطشان المحبة

ياعطشان المحبة تعالى عندنا
نرويك ونبل ريقك
من قلة حبنا
إشرب واتهنى حبة
ويانا فى أحلى صحبة
واستنى لما تبقى واحد مننا
ياعطشان المحبة تعالى عندنا
قرب نواحينا واصأل
عن بيتنا وحينا
تتعرف بينا وادخل
عتبتنا من هنا
حتحس بشوق بيسرى
جواك فى القلب دوغرى
حتقول ما لقيتش عمرى
أحباب قوى زينا
ياعطشان المحبة تعالى عندنا
ياحبيبى خلاص عرفتك
وأنا زيك مغرمة
قلبى أول ما شوفتك
طار بيا فى السما
ولمحت عينيك بتسأل
وأنا عارفة وكنت باتقل
سايباك لما إنت توصل
باب بيتنا وعشنا
ياعطشان المحبة تعالى عندنا

أم الدرر

عايزين شباب يعشق تراب
بلده ويقدر ع السهر
يحب بلده وأرضها
ما يسيبش أبدا حضنها
يزرع لها،يحصد لها
يغزل لها؟توب الفرح
م الزرع الاخضروالشجر
ويزفها على صوت آلاته
ودق فاسه فى الحجر
يبنى الأمل جوه المصانع
بالعمل..
ويعيد تاريخها ومجدها

يطلع يناطح فى السحاب
ويعيش على سطح القمر.
يعمل مواجهة مع الحياة
يوصل بعلمه لمنتهاه
ويطبقه فى المختبر،،
واشهد يانيل
فيه كام زويل
محفوظ وطه وكل جيل
يطلع أصيل مصرى
يقول أنا منَها..أناإبنها
مصر الأصيله أم الدرر
أم الحضارة والأثر؟
شوف كام أثر يامعتبر
نشهد لها، والكل عارف إنها
مهد الديانات كلَها.
والأنبيا فى أرضها
جابوا الصحارى والحضر
ما هى أصلها#طول عمرها
حصن وأمان ضد الخطر